Авам ышкаш башкы мен

Авам ышкаш башкы мен

Ѳг-бүле кижиниң келир үеде кижи болуп хевирлеттинеринге болгаш мергежил чедип алырынга чугула рольдуг. Чажывыстан тура ада-иевистиң болгаш чоок кижилеривистиң кандыг ажыл кылып турарын, оларның амыдыралчы ыдыктарын, хүндүткелин эскерип өзер бис.

Бо бүгү чүүл бистиң делегей көрүүшкүнүвүстү хевирлеп, мергежил шилип алырывыска ужур-дузалыг.

Мээң эртем чедип алырымга база келир үеде салым-чолумнуң шилилгезин эргим авам, Долаана Ивановна, айтып берип, углап чоруур. Ол бодунуң башкы ажылының дугайында үргүлчү меңээ чугаалап, чедиишкиннерин болгаш бергелерин үлежип чоруур. Авамның чагыы мындыг: «Кижиге аас-кежикти болгаш сеткилинге кирер ажылды шилип алыры чугула, а акша-шалың — ийи­ги черде». Ынчангаш мен, чуртталгамда, кандыг орукту шилип алырым дугайында боданып эгелээн мен.

Мээң авам — эге класс­тар башкызы. Бичии тургаш авамның ажылдап турганы Билелиг суурнуң бичии школазынга үргүлчү баарынга ынак турган мен. Авам меңээ кезээде аныяк, чараш, мерген угаанныг сүмелекчим болуп кады чоруур. Ынчаарда авамны кичээл үезинде дыка кичээнгейлиг көөрүнге ынак турган мен. Ам база чашкы үемни сактып ора, ынчан-на башкы мергежилди сонуургай бергенимни миннип олур мен. Бодум безин билбейн, башкы мергежилге ынакшый берген мен.

Авам база чоок кижилерим мени деткип, мээң сонуургалдарымны чөпсүнгеннер. Олар мээң сеткилимге кирер ажылымны, сонуургалымны таарзынар. Ынчангаш башкы ажылын шиңгээдип ап өөренип турар мен.

Эң-не чугула деткикчилерим — мээң өг-бүлем. Чоок кижилеримниң ачызында профессионал-даа, амыдыралда-даа күзелдерим бүдүреринге белен мен.

Александра АНАЙ-ООЛ,

ТывКУ-нуң филология факультединиң 5-ки курузунуң сургуулу.

"Шын" №24 2024 чылдың март 30