Ноябрь 1 – Тыва дыл хүнү

Ноябрь 1 – Тыва дыл хүнү
2016 чылдан эгелеп, бистиӊ республикавыста ноябрь 1-ниӊ хүнүн Тыва дыл хүнү кылдыр доктааткан. Бо чылын база ук байырлалга уткуштур янзы-бүрү хемчеглер болуп эртип турар.
• Өөредилге черлериниӊ сургуулдарыныӊ аразында «Мээӊ ачам» деп республика чергелиг шүлүктер болгаш чуруктар мөөрейи;
• Республиканыӊ чаштар садтарынга тыва дыл байырлалы;
• «Yш үне» деп этнокультурлуг диктант;
• Национал литература шаӊналы;
• Чылдыӊ эртер «Сат номчулгалары» аттыг эртем-практиктиг конференция;
• Тываныӊ улустуӊ чогаалчызы М.А. Күжүгеттиӊ 70 хар оюнга тураскааткан республика чергелиг «Сакты бердим, өңнүктерим» аттыг эртем-практиктиг конференция дээш оон-даа өске.
 
Республикада  аянныг номчулгалар мөөрейлери, чогаалчылар, эртемденнер-биле ужуражылгалар, класс шактары, куратор шактары, шын бижилге диктантылары дээш оон-даа аӊгы хемчеглерде сургуулдар, ада-иелер, ажылчы чон киржип турар.
 
Тыва дыл хүнүнге тураскааткан «Тыва дыл – чоннуӊ өнчүзү» деп республика чергелиг шуулган ноябрь 1-де 15 шакта Улусчу чогаадылга бажыӊнынга болуп эртер. Шуулган бетинде фойеге амгы үеде өөредилге черлеринде тыва дылды өөредип турарыныӊ чамдык дуржулгаларыныӊ таныштырылгазы,  Ю.Кюнзегеш аттыг Тываныӊ ном үндүрер чериниӊ номнарыныӊ ярмарка-делгелгези, Тываныӊ гуманитарлыг болгаш тускай социал-экономиктиг шинчилелдер институдунуӊ латинчиткен алфавитке үнүп турган баштайгы өөредилге номнарыныӊ делгелгези-биле чон таныжып болур аргалыг.
Шуулганныӊ программазында:
I. Албан-ёзузунуӊ байырлыг кезээ
1. Тыва Республиканыӊ Баштыӊыныӊ байыр чедириишкини
2. Шаӊналдар:
а) күрүне шаӊналдары
б) национал литература шаӊналыныӊ тиилекчилерин шаӊнаары
3. Тыва Республиканыӊ Дээди Хуралыныӊ (парламентизиниӊ) байыр чедириишкини
4. Тываныӊ өөредилге яамызыныӊ байыр чедириишкини
II. Байырлыг концерт    
 
Шуулганче тыва дыл башкыларын, уруглар садтарыныӊ кижизидикчи башкыларын, культура болгаш уран чүүл ажылдакчыларын, эртем ажылдакчыларын, чогаалчыларны, журналистерни, сургуулдарны, ада-иелерни база бүгү-ле күзелдиг чонувусту чалап тур бис!